WCIC மற்றும் PIM கூட்டாண்மையால் பெண் தொழில்முனைவோருக்கு புதிய ஆதரவு

பெண் தொழில்முனைவோர் தமது வணிக யோசனைகளை நிலையான தொழில்களாக மாற்றவும் ஏற்கெனவே உள்ள நிறுவனங்களை வளர்ச்சியின் அடுத்த கட்டத்துக்கு கொண்டு செல்லவும் புதிய வாய்ப்பு பெறவுள்ளனர். இதற்காக மகளிர் தொழில் மற்றும் வர்த்தக சபையும் (WCIC) முதுகலை முகாமைத்துவ நிறுவகமும் (PIM) இம்மாத ஆரம்பத்தில் புரிந்துணர்வு ஒப்பந்தத்தில் கைச்சாத்திட்டன. பெண்களால் வழிநடத்தப்படும் புதிய நிறுவனங்களையும் பெண்களுக்குச் சொந்தமான வணிகங்களையும் ஆதரிக்கும் இன்ஸ்பையர் என்ற கூட்டுத் திட்டம் இதன் பகுதியாகும்.

இத்திட்டம் PIM இன் வணிக அடைகாப்பு வசதியான PIM Genesis மூலம் செயல்படுத்தப்படும். பணியிடம், வழிகாட்டல், பயிற்சி மற்றும் விதை நிதி உள்ளிட்ட நிதி அணுகல் ஆகியவற்றை வழங்க முன்மொழியப்பட்டுள்ளது. முதல் முறையாக தொழில் தொடங்குவோருக்கு சட்டத் தேவைகள், கணக்குவைப்பு மற்றும் வரிவிதிப்பு குறித்த பயிற்சி கிடைக்கும்; ஏற்கெனவே இயங்கும் வணிகங்களுக்கு தயாரிப்பு மேம்பாடு மற்றும் வலையமைப்பு உருவாக்கத்தில் உதவி கிடைக்கும். ஆரம்ப கால அவகாசம் ஒரு வருடமாகும்; பரஸ்பர உடன்பாட்டின் மூலம் நீட்டிக்கப்படலாம்.